Өзгөчө кырдаалдар министрлигинин (ӨКМ) куткаруучулары Ала-Арча улуттук паркындагы Адыгене капчыгайында жолдон адашып кеткен Орусиянын үч жаранын - 49 жаштагы эркек кишини жана анын 19 жаштагы кызы менен 10 жаштагы уулун куткарышты.
Министрликтин басма сөз кызматы билдиргендей, куткаруучулар туристтерди 29-март күнү таңкы саат 5:30да аман-эсен тоодон алып түшүрүшкөн. Аларды издөө иштери 28-марттын кечинде башталган. Капчыгайда аба ырайы кескин өзгөрүп, кар жаагандыктан, туристтер тоо боорундагы жалгыз аяк жолду таппай, адашып калышкан.
“Аларда түн ичинде белги бере турган буюмдары да жок экен. Капчыгайды өрдөй издеп, эч кимди тапкан жокпуз. Тоонун экинчи тарабы менен издеп келе жатып, болжол менен түнкү саат үчтө үндөрдү уктук. Көрсө, жеңил кийинип чыккан балдары үшүп, аларды атасы сооротуп жатыптыр”, – деди издеп-куткарууга жооптуу офицер, лейтенант Нургазы Орозов.
2023-жылы август айында Борис Михайлов жана анын сегиз жаштагы кызы Ала-Арча паркындагы дарыяга агып кеткен. Алардын сөөгү үч күндөн кийин табылган.
Ала-Арча улуттук жаратылыш паркы 1976-жылы негизделген. Ал жалпысынан төрт аймакка бөлүнөт, эс алуу, спорттук альпинизм зоналары баарына ачык. Жапайы жаныбарларды көбөйтүү, байкоо жана азыктандыруу аймагы корукка алынган. (BTo)
Facebook шеринеси